2.6.07

خزعبلات !

شغل شغل .. هو كل يوم شغل شغل

بابا هيوصلني النهاردة الشغل هو انا ليه لازم اروح الشغل كل يوم
مش عارفة ونفسي اعرف
نفسي اعرف حاجات كتير اوي منها انا المفروض اعمل ايه في حياتي
ماهو ربنا ماخلقنيش عشان كده اكيد سبحانه وتعالى خلقني لسبب
لعبادته
ماشي بس ازاي؟!
مانا ممكن اعبد ربنا وانا قاعد مكاني وممكن اعبد ربنا وانا مع الناس وممكن اعبد ربنا وانا باعمل مية حاجة..

هو ممكن الموت يجي في لحظة !




انا مش باسأل عشان مش عارفة انا بس مش مستوعبة
من شوية لقيت واحد زميلنا في الشغل داخل وشايل ولد صغير لابس بدلة زي بتاعت بتوع النظافة وكاب قديم وكوفية قديمة طويلة قوي عليه ملفوفة على رقبته
ولاقيت زميلنا بيقولي هبه خللى بالك منه هاروح اجيب عربيتي واجي اشوف هانعمل وراح واخدني على جنب وقالى اصل كان في اتنين منهم باباه وقعوا في بلاعة وغرقوا ماتوا !
الولد شاف باباه بيموت قدامه
الولد قعد يعيط ويقول انا عايز ابويا ومن كتر عياطه وهلعه خاف لزميلنا ده حتي يسيبوه ويخرج, راح معاه غسله وشه والولد برضه مش ممكن شكله وهو بيعيط يقطع القلب.. صعب قوي ان راجل يعيط بس مع الموقف شفت زميلنا حابس الدموع في عينه بالعافية دخلت مكتبي وانفجرت في البكاء بكيت على اللي احنا فيه بكيت لأني تصورت ان يكون واحد مهما كان غلبان مصيره انه يغرق وف بلاعة كمان!
كمان شوية ماستحملتش اقعد في المكتب خرجت في الريسبشن بره لاقيت زميلنا جي سألته ها واديت الولد فين قاللى الحمد لله طلعوهم من البلاعة بس عندهم اصابات والولد الصغير سابه مع جده..
يا رب
احفظ كل المساكين اللي مالهومش غيرك
يا رب
احشرنا في زمرة المساكين
يا رب
احسن خاتمتنا
يا رب
احسن خاتمتنا وتوفنا إليك مكرمين

لحظة بس تسوى كتير



ياااااه
الحمد لله العظيم اللطيف مدبر الأمر كله
دخلت المكتب وكأني لسه بابدأ اليوم سمعت صوت ميه بره الشباك اللى كان موارب بصيت لاقيت الراجل الطيب ده من عمال النظافة اللي كان من اسبوعين واخد سلفة عشان يجوز بنته وبعد ماجوزها جالنا فرحان قوي واده كل واحد شيكولاتين
لاقيته بيسقي الزرع رحت فاتحة الشباك وقلتله صباح الخير
قالي يا صباح الورد وعلى وشه ابتسامة تسوى كتير قوي
ابتسامة شفتها علي وشه فضلت مستمرة حتى بعد ما قفلت الشباك اللى عامل زي المراية ده واللى اداني الفرصة اني افضل شايفة ابتسامة السعادة على وشه حتى بعد اما قفلت
ابتسامة خلتني مبسوطة جدا بعد ما كنت من لحظات حزينة جدا
الناس دي مش عايزة حاجة غير لقمة مش لازم تشبعهم قوي وهدمة تسترهم وحد يعاملهم بحنية وذوق من غير مايحسسهم انه بيعطف عليهم
اااه لو الناس تفكر لحظة انها في الآخر مش هاتخد حاجة ومش هايبقلها حاجة غير عمل وحتي لو معاها عمل من غير رحمة ربنا ما يسواش حاجة

كان لازم اكتب اللى حسيت بيه وف وقته والا ماكانش هايطلع كده
خزعبلات سموها أو خواطر أو أي حاجة المهم ان دي انا