بجد بقت حاجة تحرق الدم..! مش معقولة كل ما اقعد اتفرج على التلفزيون واقرر اشوف حاجة مفيدة اعيط! ايوة كان زمان الواحد مش بيتأثر قوي من اللي بيسمعوا سواء غلطات ادارية أو كوارث طبيعية أو ما إلى ذلك.. بس المرة دي الظاهر كانت الجرعة مكثفة.. انا للأسف اتميز بإن الأخبار بتوصلنى متأخرة شوية! يعني مش متابعة جيدة للأخبار فدائما تلاقيني باتصدم بعد الناس كلها.. أقرب حاجة من يومين أول امبارح روحت بدري من الشغل -عقبال امالتكم بدأت شغل من اسبوع- فا كان في فرصة اني اتفرج على التلفزيون شوية.. مرة واحدة صدمت بخبر القطار اللي اترزع في قطار تاني في قليوب.. بصوا الفكرة نفسها حصلت قبل كده بس للأسف الطريقة كل مرة بتتطور للأسوأ! جبت العاشرة مساء قلت اكيد هايبقوا جايبيين تقرير محترم وفعلا لاقيت جايبيين الناس بتقول اللي شافوه.. جابوا واحد كده كان بيقول السواق فضل محبوس في الكابينة بتاعته والناس ملمومة عليه مش عارفيين يخرجوه حاولوا وحاولوا مفيش فايدة وبعدين السواق طلب مياه جابولوا شرب وبعدين فاضت روحه للي خلقها.. ياااااااه اد كده البني آدم عمال يرخص عندنا لما ما يبقاش في اغاثة سريعة -بمعنى كلمة سريعة- للناس في المواقف اللي زي دي يبقي مش البني آدم بيرخص اوي! طبعا كل الحوارات دي متظبتة في القنوات المصرية.. تحس كأن القصة كلها في بلد تانية اصلا! يعني فعلا الواحد كان هايطق وهو بيشوف سيادة رئيس الوزراء وهو بيطمئن على المرضى.. مسرحية هزلية كان بيلعب فيها دور البطولة.. ازيك عامل ايه ؟ انت كنت في القطر؟!! لأ كان بيلعب كرة شراب في الشارع والعيال شنكلوه! وواحد تاني يقولوه متقلقش مش هايخرجوك من هنا الا لما يصلحوك! وواحد تاني يقوله معلش قدر ولطف.. هو فعلا قدر ولطف.. بس زي ما ربنا القادر اللطيف .. هو سبحانه برضه المنتقم الجبار..قادر يا رب تنجينا من المصائب اللي حوالينا من كل ناحية دي!!
No comments:
Post a Comment