حدث بالفعل !

posted on 8th of june 2006

مشهد (1)
المكان: الأوضة المسماة بقاعة المالتيميديا في كليتنا العزيزة.
الزمان: في يوم من ذات الأيام.
الحدث: مناقشة بحث يعتبر هو الامتحان لمادة تسمى أبحاث تطبيقية.

يدخل رئيس القسم وهو أستاذ المادة ويبدأ في تقديم ما سيحدث ثم تخرج أول مجموعة لمناقشة بحثها ثم
سكويـــــــــــــــــــــــــــــــــــــــــــــــك سكويــــــــــــــــــــــــــــــــــك ...
ايه ده؟ ايه الصوت ده؟! وفجأة خرج من تحت كشاف النور برصين .. أيوة برصين مش ده الغريب ده العادي في كليتنا الغريب انهم تقريبا كانوا بيتخنقوا وراح واحد منهم تقريبا عض التاني في رجله لأنه بعد كده –يا عيني- كان ماشي على رجل ورافع التانية..! وطبعا لكم أن تتخيلوا حالة الرعب التي انتابت الكل وصاحبها حالة ضحك خاصة بعد أن أوضح لنا دكتور المادة أنهم أكيد برضه بيناقشوا مشاكلهم ومش بعيد يكونوا هما اللي اتخضوا من صوتنا العالي ..!
اللذيذ إن الدكتورة المشرفة على البحث اللى كان المفروض هايتناقش ساعتها سابت البحث والعيال كانوا بيناقشوا مع نفسهم وهي بقه كانت بتراقب البرص كانت خايفة أوي.. (:
المهم بعد شوية الحمد لله البرص اختفى والناس انشغلت والموقف خلص واليوم انتهى.

مشهد (2)
المكان: بيتنا الجميل.
الزمان: يومين أو تلاتة كده بعد المناقشة.

جرس التليفون يرن..
ماما ترد: آلو ازيك يا نهلة ايه يا بنتي عاملين ايه في مشروع التخرج؟ شيدوا حيلكم ياللا هانت وتخلصوا. طيب يا حبيبتي هبه معاكي اهي.
هبه: ايوة ازيك يا نهلة.. ايه الأخبار..
نهلة: الحمد لله.. هبه انا عايزة أسألك سؤال مهم
هبه: خير يا نهلة .. قولي يا بنتي في ايه؟
نهلة: هبه هو البرص بياكل ايه؟
هبه: ..................... مين ؟
نهلة: البرص.. ايه يا هبه البرص تفتكري بياكل ايه؟
هبه: والله يا نهلة احرجتيني أصلي عمري ما فكرت هوا بياكل ايه .. وبعدين احنا خلاص فكرنا في كل حاجة في الدنيا والمشروع ومش فاضل غير اننا نعرف البرص بياكل ايه؟ مش مصدقاكي..!
نهلة: يا هبه أصلي تعبت من كتر التفكير في كل حاجة فا قولت أفكر في حاجة تانية.
هبه: فا طبعا ما لقيتيش غير البرص تفكري فيه ..
نهلة: طيب بجد كده قوليلي تفتكري بياكل ايه اصلي كمان اتكسفت أسأل الأولاد..
هبه: والله يا نهلة اعتقد انه بياكل حشرات أو ممكن بواقي أي حاجة..
نهلة: يعني مش بياكل تراب؟
هبه: تراب ؟ تراب ايه يا نهلة هو فيه حاجة بتاكل تراب؟ وبعدين حيرتيني بيتهيألي زي ما قولتلك كده.
نهلة: أصل انا اكتشفت ان الحيوان ده ماعرفش عنه حاجة خالص..
هبه: اه صحيح ما يصحش وبعدين انت خلاص خلصتي كل الحيوانات ومش فاضل غير البرص فعلا.
نهلة: وبعدين كنت عايزة اعرف الناس بتكرهه ليه؟
هبه: والله يا بنتي انا اذكر فيما اذكر انه عشان حاجة ليها علاقة بقصة سيدنا ابراهيم كانوا بيقولوا ان البرص كان بينفخ في النار عشان تزيد.. كان شرير يعني ده حتى بيقولوا لو قتلتيه تاخدي حسنات..
نهلة: في حد لما يمموت حاجة ياخد حسنات ؟! وبعدين أصلا البرص هايتحسب ؟!
هبه: بصي يا نهلة انتي كلامك منطقي إلى حد ما الله أعلم .. حرام عليكي لخبطيني!
نهلة: أصلي كمان كنت عايزة اعرف ممكن أربي برص؟
هبه: برص ايه اللي تربيه يا لينا .. ابوس ايدك كفاية كلام عن الموضوع الشيق ده ونشوف مشروعنا ربنا يسترها علينا..
واكتملت المحادثة وانتهت على خير ولسه نهلة بتفكر: هو البرص بياكل ايه ؟!