ew3a el sareeeee3 ..!

posted on 14th Sep. 2006..

• كل الغلطة كانت اننا قررنا نصيف السنة دي.. قرية في الساحل الشمالي قبل مارينا..كان معانا خالي واسرته.. البداية كانت واحنا رايحيين لما الكبار اقترحوا ناخد طريق القاهرة العلمين علشان -قال ايه- مختصر.. اوك مافيش مشكل.. رحنا بسلام والاسبوع عدي مش بسلام اوي بس عدي.. وجه وقت الرحيل.. بص بقى يا والدي احنا خلاص عرفنا الطريق يعني مش هايبقي في مشكلة لو سبقنا واحنا راجعيين وهما خاليهم يمشوا براحتهم.. بس بابا كان مصر اصرار غريب اننا نمشي ورا بعض -قلبه كان حاسس- ياللا عالبركة ! بدأت الرحلة والجو كان يومها الحر اللزج ده فكنت شبه مغمى عليا لغاية ما فجأة حصل اللى ولا كان عالخاطر ولا عالنية! عربيتنا بتركن بهدوء، على مرمى البصر الصحراء القاحلة، الشمس في كبد السماء، عربية خالو عطلت ومحتاجة ونش يقطرها لغاية البيت مالهاش حل تاني ! نزلنا من العربية ولكم ان تتخيلوا المشهد أسرتي مكونة من 5 أفراد وأسرة خالي مكونة من 6 أفراد واقفين فالـفراغ! نعمل ايه نعمل ايه طنط اقترحت نتصل بالدليل ويدونا رقم الاغاثة السريعة اللي بيكتبوا نمرتها على الطريق.. قلت يا سلام احنا عندنا اغاثة سريعة يا مسهل.. بعد حوارات طنط قالتلهم احنا واقفين على الطريق في الكيلو كذا ومحتاجين ونش يقطر العربية قالولها هانبعاتلك ناس دلوقتي.. طبعا مش عايزة اقولكم حالتنا كانت ازاى كل العوامل الجوية كانت ضدنا غير انه ثبت ان الذباب في المناطق دي تقريبا متوحش! اكيد اي حد يتوقع ان المشكلة اقتصرت على انهم اتأخروا علينا .. يا ريت..! بعد تقريبا ساعة ونصف أو ساعتين لاقينا ميكروباص بيركن جنبنا أجرة المنيا وبمنتهى البساطة واحد عسكرى مرور نازل منه .. نسيت اقولكم معلش ان العسكري ده هو الإغاثة السريعة !! اه والله العظيم هوا ده تصور المسئوليين المصريين عن الاغاثة السريعة فرد واحد عسكري مرور وجاي في ميكروباص أجرة نازله ومشي! يعني احنا نعمل ايه دلوقتي؟ بصوا حضرتك -ده كلام العسكري- اصل الونشين بتوع الحكومة باظوا الضباط بوظوهم فا انا ممكن اتصلكم بفلان عنده ونش خاص خد يا عم الموبايل ! ما هو طبعا مش هايستخدم موبايله هايستخدم بتاع طنط ماشي ما هو اغاثة بقى والراجل جاي يفكر معانا نعمل ايه كتر خيره .. ايوه يا عوض تعرف تيجي في الكيلو كذا العلمين معانا عربية عايزة تتقطر ماشي يا عوض ايوة يا محمدين تعرف تيجلنا ... ولا الهوا ولا اي نتيجة بتظهر في الأفق.. شوية ووقفوا عربية نقل عشان تنقلنا حتى للرست نبقي في حتة عدلة شوية مافيش خطوتين وثبت ان مش هاينفع حبل وقصص دي العربية كلها لازم تبقي فوق ونش.. شوية ووقفت لنا عربية شرطة -معدية صدفة لا تكونوا فاكرين بعاتوهلنا ولا حاجة- فا صعبنا عليهم وقفوا يشاركونا المأساة والتفكير -افكركم تاني ان دي وظيفة الاغاثة نحن نشارككم اتخاذ القرار!- فييييييين وفييييييين لما عرفوا يوصلوا لواحد هايجي بونش بس المشكلة انه هايجي من قرية الأسد يعني مش قبل ساعة ساعة ونصف على ما يجي.. بابا قال مش هاينفع نفضل كلنا مستنيين احنا نشوف حاجة تركبوها وهايفضل قاعد مستني الونش بابا واخويا وابن خالي شوية كده وجه اوتوبيس حكومة صغير وقفوا عسكري المرور -الله يستره كان لسه واقف معانا- ركبنا نزلنا انا وماما واختي عند المحور خدنا مواصلة تانية لميدان الرماية وبعدين مواصلة تالتة وبعدين بقى مشينا شوية صغيريين لحد البيت !! بصوا انا كنت حاسة اصلا اني راجعة من الساحل مشي ! ومش عارفة صراحة ممكن اعلق على الموضوع اقول ايه.. بس ممكن نطلع حكم ودروس مستفادة :
  1- كل واحد بعد كده قبل ما يسافر يتأكد ان في حد في عيلته عنده ونش.
  2- ليه تسافر من طريق العلمين لما ممكن تسافر من طريق مصر اسكندرية ؟
  3- لما حد يسألك بعد كده اذا كان عندنا اغاثة سريعة قوله اه طبعا وعلى مستوى راقي من الخدمة -على يدي- !
  4- دور على مدرب نفسي يديلك كورس في برود الأعصاب والغلاسة عشان تعرف تتعامل مع الناس في البلد دي.. !